Bakı Ali Neft Məktəbində (BANM) dünyanın böyük neft və qaz servis şirkəti olan Baker Hughes-un Azərbaycandakı nümayəndəliyi ilə  görüş keçirilib. Görüşdə BANM-ın rektoru Elmar Qasımov, Baker Hughes şirkətinin Azərbaycan və Gürcüstan üzrə direktoru  Qreiq Rasel Lindsay, şirkətin miqrasiya üzrə meneceri Tural Ahmad və BANM-ın əməkdaşları iştirak ediblər.

       BANM-ın rektoru Elmar Qasımov Ali Məktəbin Baker Hughes-la yaranmış sıx əməkdaşlığından məmnun olduğunu bildirib. Cənab Rasel isə BANM-ın şirkətdə  3 ay yay təcrübəsi keçmiş tələbələrindən çox razı qaldığını, onların bilik və dünyagörüşünün Baker Hughes-ın standartlarına tam cavab verdiklərini qeyd edib. O həmçinin bildirib ki, şirkət BANM-dan növbəti təcrübəçiləri seçmək və onları 3 ay müddətində şirkətin işlərinə cəlb etmək və təlimlər keçmək niyyətindədir.

       Rektor Elmar Qasımov Baker Hughes-un Azərbaycan və Gürcüstan üzrə direktorunu  növbəti ay Ali Məktəbin tələbələrini  motivasiya etmək üçün böyük seminar keçməyi təklif edib. Cənab Rasel isə böyük məmnuniyyətlə təklifi qəbul edib. 

       Görüşdə həmçinin iki tərəfli əlaqələrin genişləndirilməsi üçün əməkdaşlığın bır sıra yeni istiqamətləri müzakirə edilib.

      Qeyd edək ki, şirkət artıq neçə ildir ki BANM ilə müqavilə əsasında əməkdaşlıq edir. Baker Hughes neft və qaz sənayesində innovativ xidmətlər, məhsul və texnologiyalar üzrə ixtisaslaşmış beynəlxalq səviyyəli şirkət olaraq dünyanın 80-dən artıq ölkəsində fəaliyyət göstərir və ümumilikdə 58.000-dən çox işçiyə sahibdir. Eyni zamanda, Baker Hughes şirkəti 11 texnoloji mərkəzə malik olaraq elm və texnologiya sahələrinə ən çox investisiya yatırımı edən şirkətlər sırasındadır.