AZ / EN / RU
Bakı Ali Neft Məktəbində bp-nin gənc mühəndislər üçün biznes təhsili proqramına başlanılıb

        

           Bu gün bp Azərbaycanda gənc mühəndislər üçün yeni biznes təhsili proqramına başlayıb. Azərbaycanda bp tərəfindən tam maliyyələşdirilən bu proqram gənc mühəndislərin öz karyeralarında ehtiyac duyduqları idarəetmə və biznes bacarıqlarını inkişaf etdirmələrinə yardım etmək üçün nəzərdə tutulub. Bu layihə bp-nin ölkədə potensialın yaradılmasına və ümumilikdə təhsilin inkişafına dəstək olmaq öhdəliyinin bir hissəsidir.

 

       Proqram Bakı Ali Neft Məktəbi (BANM) tərəfindən idarə olunacaq və ölkədəki bütün təşkilatların gənc mühəndisləri üçün açıq olacaq. Proqramın kurikulumuna biznesin idarə olunmasına dair nəzəri və praktiki biliklər, nizamlayıcı təlimlər və uğurlu təcrübəçilər ilə iş daxildir.

 

       Bu proqram çərçivəsində gənc mühəndislərə daxili və xarici əməliyyatları təkimilləşdirməkdə lazım olan analitik vasitələr və üsulları tədris etmək üçün geniş təlimlər təklif olunacaq. Gözlənilir ki, bu yeni bacarıqlar gənc mühəndislərə mürəkkəb biznes problemlərini təhlil etməyə və qiymətləndirməyə imkan yaradacaq və “problem həll etmə” və “qərar vermə” kimi sahələrə çevik yanaşmalar tətbiq etməyə kömək edəcək.

 

 

       Bu gün proqramın açılışına həsr edilmiş onlayn tədbirdə çıxış edən bp-nin Yaxın Şərq və Xəzər Regionunda xarici əlaqələr və kommunikasiya üzrə vitse-prezidenti Bəxtiyar Aslanbəyli uzun illər gənc mühəndisləri işə götürərkən bir çox hallarda onların peşə bilikləri və texniki bacarıqları güclü olsa da, idarəetmə və biznes bacarıqlarında çatışmazlıqlar olduğunu müşahidə etdiklərini deyib. “Beləliklə, qərara gəldik ki, gənc mühəndislərə dünyada və Azərbaycanda müasir bizneslərin və təşkilatların daha çox tələb etdiyi zəruri biznes idarəetmə bacarıqlarının inkişaf etdirilməsində yardım edə bilərik. Bu mühüm proqramın idarə edilməsini öz üzərinə götürdüyünə görə BANM və onun rəhbərliyinə minnətdarlığımızı bildiririk və əminik ki, bu, bp və bu möhtəşəm ali məktəb arasında çox uğurlu əməkdaşlığın digər bir bariz nümunəsi olacaq.”

 

 

       Bakı Ali Neft Məktəbinin rektoru Elmar Qasımov bildirib ki, bu cür layihələr gənc mühəndislərdə biznes təfəkkürünün, menecer bacarıqlarının formalaşmasına xidmət edir.

   

       “Əminəm ki, layihədə tədris olunacaq modullar  iştirakçılara onların biznes karyerasında, hətta gündəlik həyatlarında müsbət dəyişikliklər edəcək biliklər verəcək. Peşəkar kadr olmaq istəyən mühəndislərin akademik və texniki biliklərlə yanaşı, sosial bacarıqlara da yiyələnməsi müasir dövrün tələbidir. Belə bir unikal layihəyə dəstək verdiyinə görə BP şirkətinə təşəkkür edir və bütün iştirakçılara uğurlar diləyirəm.”

 

       Təlimlər səkkiz əsas moduldan ibarət olacaq: Rəhbərlik və komandalar: digərlərini necə motivasiya etməli; Layihələrin idarə edilməsi və risklər; Maliyyə idarəetməsi; İnsan resursları; Dəyilikliklərin idarə olunması; “Design thinking”; Çevik idarəetmə; Etik normalar və tələblərə uyğunluq.

   

       Layihənin ümumi dəyəri 258000 AZN-dir.