AZ / EN / RU
Kimya Mühəndisliyi Kafedrası

Bakı Ali Neft Məktəbində Kimya mühəndisliyi kafedrası 2013-cü ildə yaradılmışdır. Bu kafedrada Heriot-Watt Universiteti (Böyük Britaniya) tərəfindən hazırlanan tədris proqramına əsasən "Kimya mühəndisliyi" ixtisası üzrə bakalavr və magistr hazırlığı həyata keçirilir. Qeyd olunan ixtisas üzrə dokrorantura pilləsinin açılması nəzərdə tutulur.

Tələbələr ilk ili İngilis dili və İKT hazırlığını müvəffəqiyyətlə bitirdikdən sonra dörd illik mütəxəssis hazırlığına cəlb olunurlar. Bu təhsil müddətində onlar həmçinin Kimya mühəndisliyi kafedrasının nəzdində olan laboratoriyalarda təcrübələr edərək nəzəri biliklərini tətbiq edir, beləliklə də əsas prinsipləri dərindən dərk edərək onlar əsasında hesabatlar yazırlar.

Universitetin qaydalarına müvafiq olaraq tədris proqramları çərçivəsində tələbələr yay istehsalat təcrübəsi zamanı neft-qaz sənayesi üzrə fəaliyyət göstərən müxtəlif müəssisələrə göndərilir. Bu idarələrdə tələbələr müxtəlif kimyəvi prosesləri həyata keçirən qurğuların işi, orada gedən proseslər, texnoloji reqlamentlər, idarəetmə sistemləri, sağlamlıq, təhlükəsizlik və ətraf mühitin mühafizəsi qaydaları haqqında məlumatlandırılır.

Kafedrada müdir, bir Azərbaycan Milli Elmlər Akademiyasının müxbir üzvü, bir professor (tibb üzrə), üç dosent, bir baş müəllim, üç müəllim, laboratoriya müdiri, üç istehsalat təlimi ustası və altı böyük laborant fəaliyyət göstərir. Kafedranın əməkdaşları tərəfindən elmi-tədqiqat işləri də aparılır.