AZ / EN / RU
İngilis dili və Humanitar fənlər Mərkəzi

Proqram haqqında

Müddət: 1 il

Bakı Ali Neft Məktəbinin İngilis dili və humanitar fənlər mərkəzi 2012-ci ildən fəaliyyət göstərməkdədir. Mərkəzdə 4 dosent, 9 baş müəllim, 2 müəllim və 2 laborantdan ibarət kadr heyəti ingilis dili ilə yanaşı, “Azərbaycan tarixi”, “Enerji geosiyasəti” və “Azərbaycan dili və nitq mədəniyyəti” dərslərinin tədrisini həyata keçirir. 

Mərkəzin əsas missiyası qloballaşan dünyada Bakı Ali Neft Məktəbinin tələbələrini dünya standartlarına cavab verən, müasir dünyagörüşlü mütəxəssis kimi yetişdirmək, eyni zamanda onların ingilis dili vərdişlərini inkişaf etdirməkdir. Peşəkar müəllim heyəti xüsusi intensiv metodlardan istifadə etməklə, 1 illik proqram müddətində tələbələrə ən yüksək səviyyədə tədrisin çatdırılmasını təmin edirlər. 

Ali Məktəbdə mütəxəssis hazırlığı həyata keçirilən hər 3 proqramda (Neft-qaz mühəndisliyi, Kimya mühəndisliyi və Proseslərin avtomatlaşdırılması mühəndisliyi) tədris ingilis dilində olduğundan ixtisas təhsilinə başlamaq üçün tələbələr hazırlıq proqramını İELTS (Beynəlxalq İngilis Dili Test Sistemi) üzrə minimum 6.0 balla (IELTS) strukturuna müvafiq olaraq hər hissə minimum 5.5 bal olmaq şərti ilə) başa vurmalıdırlar. Bu məqsədlə hazırlıq proqramının prioritet hədəfi 5 illik bakalavr təhsilinin ilk ilində ingilis dilinin mükəmməl səviyyədə öyrədilməsini həyata keçirməkdir. İl sonunda İELTS imtahanından uğurlu nəticələr əldə etmiş tələbələr ixtisasları üzrə 2-ci kursa başlaya bilərlər. 

Ali Məktəbə yeni qəbul edilmiş tələbələrin müvafiq tələblərə cavab verən İELTS sertifikatları mövcud olduğu halda həmin tələbələrdən ingilis dilinin tədrisinə qoşulmaq tələb edilmir. Bunun üçün tələbələr sertifikatlarını tədris ilinin başlanğıcında mərkəzimizə təqdim etməklə birbaşa bakalavr dərəcəsinə başlaya bilərlər. 

Dərslərin təşkili

Tələbələrin ingilis dilini effektiv formada mənimsəməsi üçün səviyyələr üzrə 10 nəfərlik qruplar təşkil edilir. İntensiv dərslər beynəlxalq ingilis dili tədrisi standartlarına uyğun vəsaitlər, audio-video materiallar əsasında müasir texnoloji avadanlıqlarla təchiz edilmiş otaqlarda keçirilir. Semestr ərzində mərkəzin tərtib etdiyi xüsusi sistem əsasında qiymətləndirmə aparılır.

 

1-ci semestr

İngilis dilinin tədrisi proqramı çərçivəsində 1-ci semestrdə  “Ümumi ingilis dili” və təhsil üçün zəruri hesab olunan “Akademik ingilis dili” istiqamətində tədris edilən dərslərdə tələbələr ingilis dilini yüksək səviyyədə öyrənməklə yanaşı, şifahi və yazılı formada düzgün anlama və ifadə etmə –  danışıq, dinləmə, oxu, yazı vərdişlərini də inkişaf etdirirlər. Həmçinin, tələbələrə geniş ingilis dilli auditoriyalar üçün çıxışlar, təqdimatlar hazırlamaq və akademik yazı qaydaları öyrədilir.

 

2-ci semestr

İlk tədris ilinin 2-ci semestrində kifayət qədər dərin dil bilgilərinə və nitq vərdişlərinə yiyələnmiş tələbələr İELTS hazırlığına başlayırlar. Bir illik hazırlıq proqramını bitirən tələbələrdən növbəti tədris ilinin başlanğıcına qədər İELTS sertifikatlarını İngilis dili və humanitar fənlər mərkəzinə təqdim etmək tələb olunur. 

 

 

 

İngilis dilində təhsilin üstünlükləri

BANM beynəlxalq tələblərə cavab verən universitet olduğundan ingilis dilində təhsil verməklə həm yerli, həm də əcnəbi tələbələrin Ali Məktəbdə təhsil almasına şərait yaradır. Bu baxımdan tələbələrin bir sıra beynəlxalq tələbə mübadilə və təcrübə proqramlarında, layihələrdə iştirak etməsində ingilis dilinin rolu əvəzedilməzdir. İngilis dili və humanitar fənlər mərkəzi tələbələrin nəinki təhsil, o cümlədən uğurlu karyerası üçün ingilis dilini müasir interaktiv metodlarla, dövrün tələblərinə cavab verəcək standartlarda tədris edir və tələbələrə qlobal proseslərə qoşulmaqda ilk qapıları açır.

 

 

 

 

 

 

 

Əlaqə: 

Email: gulay.yasinli@socar.az

No: +994 12 521-33-59 / (33-037)

Ünvan:
Bakı şəhəri, Xətai r., Xocalı pros., 30, AZ1025

Bakı Ali Neft Məktəbi