AZ / EN / RU
BANM Tarixi

Bakı Ali Neft Məktəbin yaranma tarixi haqqında

Bakı Ali Neft Məktəbi dövlət ali təhsil müəssisəsi statusunda Azərbaycan Respublikasının Prezidenti cənab İlham Əliyevin "Azərbaycan Respublikası Dövlət Neft Şirkətinin strukturunda dəyişiklik edilməsi haqqında" 29 noyabr 2011-ci il tarixli 539 nömrəli Fərmanı ilə yaradılıb.

2012-ci ilin yanvar ayında Böyük Britaniyanın Edinburq şəhərində Azərbaycan Respublikası Dövlət Neft Şirkətinin (SOCAR) sosial məsələlər üzrə vitse-prezidenti Bədəl Bədəlov və Heriot-Vatt Universitetinin rektoru professor Stiv Çapman tərəfindən Bakı Ali Neft Məktəbi ilə mütəxəssis hazırlığında əməkdaşlıq haqqında "Anlaşma Memorandumu" imzalanıb.

2012-ci ilin fevral ayının 29-da Bakı Ali Neft Məktəbinin Nizamnaməsi Azərbaycan Respublikası Ədliyyə Nazirliyində Dövlət qeydiyyatından keçib.

2012-ci ilin aprel ayının 10-da Azərbaycan Respublikasının Prezidenti İlham Əliyevin Sərəncamı ilə Elmar Qasımov Bakı Ali Neft Məktəbinin rektoru vəzifəsinə təyin edilib.

2012-ci ilin may ayının 26-da Bakı Ali Neft Məktəbinin rektoru Elmar Qasımov və Böyük Britaniyanın Heriot-Vatt Universitetinin rektoru professor Stiv Çapman birgə mütəxəssis hazırlığının təşkilinin əsas prinsiplərini özündə əks etdirən müqavilə imzalamışlar.

 

2012-ci ilin may ayının 31-də Azərbaycan Respublikası Təhsil Nazirliyi Bakı Ali Neft Məktəbinə "Neft-qaz mühəndisliyi" və "Kimya mühəndisliyi" ixtisasları üzrə mütəxəssis hazırlığı üçün 071007 nömrəli xüsusi icazə (lisenziya) verib.

2012-ci ilin aprel-sentyabr ayları ərzində Bakı Ali Neft Məktəbi üçün ayrılmış binada idarəetmə və tədris qurumlarının fəaliyyətini təmin edilməsi üçün müvafiq infrastrukturun yaradılması məqsədilə təkliflər hazırlanıb həyata keçirilmiş, tədris və tədrisi idarə edən struktur bölmələrinin ştatlarına təyinatlar həyata keçirilmiş, may ayından "İngilis dili mərkəzi", iyul ayından isə "Kompüter və informasiya-kommunikasiya texnologiyaları" kafedrası fəaliyyətə başlayıb.

Abituriyentləri Bakı Ali Neft Məktəbinə cəlb etmək üçün 2012-ci ilin aprel-avqust aylarında orta məktəblərdə məzunlarla görüşlər keçirmək və kütləvi informasiya vasitələrində məlumatlar yaymaq yolu ilə tanıtım aksiyaları keçirilib.                 

2012-ci ilin iyul ayının 19-da Bakı Ali Neft Məktəbinin rektoru Elmar Qasımov və Böyük Britaniyanın Heriot-Vatt Universitetinin rektoru, professor Stiv Çapman tərəfindən Bakı Ali Neft Məktəbində bu universitetin hazırlıq proqramının tətbiqi ilə bağlı müqavilə imzalanıb.

Tələbə Qəbulu üzrə Dövlət Komissiyasının (TQDK) 2012-ci ilin avqust ayında keçirdiyi test imtahanlarının nəticələrinə görə BANM-ə ilk dəfə 116 nəfər qəbul olmuş, onlardan 58-i "Neft-qaz mühəndisliyi", 58-i "Kimya mühəndisliyi" ixtisasları üzrə sentyabrın 17-dən hazırlıq mərhələsində tədrisə cəlb olunmuşlar. Qəbulda orta bal 631 olub. Həmin il BANM-ın 11 tələbəsi Prezident təqaüdünə layiq görülüb.

TQDK-nın 2012-ci ildəki qəbul kampaniyasının nəticələrinə görə tərtib etdiyi reytinq cədvəlində Bakı Ali Neft Məktəbi ölkənin 51 ali təhsil müəssisəsi arasında mütləq lider olub.               

2013/2014-cü ildə TQDK tərəfindən keçirilmiş test imtahanlarının nəticələri əsasında müsabiqədən keçmiş 50 abituriyent "Neft-qaz mühəndisliyi", 50 nəfər "Kimya mühəndisliyi" və ilk dəfə 20 nəfər isə "Proseslərin avtomatlaşdırılması mühəndisliyi" ixtisaslarına qəbul olmuş və sentyabr ayının 16-dan hazırlıq mərhələsində tədris prosesinə qoşulmuşlar. 2013-cü ilin qəbulunun nəticələrinə görə orta bal 656 olub. Həmin il BANM-ın 15 tələbəsi Prezident təqaüdünə layiq görülüb.

2014/2015-ci tədris ili üçün ali təhsil müəssisələrinə qəbul olmuş abituriyentlərin orta ballarına görə ən yüksək nəticələrə malik ali məktəblərin siyahısında Bakı Ali Neft Məktəbi qəbulda 668 orta balla birinci yerdə qərarlaşıb. Həmin il BANM-ın 17 tələbəsi Prezident təqaüdünə layiq görülüb.

2015/2016-cı tədris ilində TQDK-nın ali məktəblərə keçirdiyi qəbulda Bakı Ali Neft Məktəbi üzrə ümumi minimal bal 659, ümumi orta bal isə 676 olub. Bu nəticə respublika üzrə ən yüksək nəticə olub, hər üç ixtisas üzrə ötən illərə nisbətən bütün göstəricilərdə dinamika müşahidə olunub. I qrup üzrə keçirilmiş test imtahanlarında 700 bal toplayan 7 tələbədən 3-ü Bakı Ali Neft Məktəbinə qəbul olub. 2015/2016-cı tədris ilində BANM-in 17 tələbəsi Prezident təqaüdünə layiq görülüb.                                           

2016/2017-ci tədris ilində Dövlət İmtahan Mərkəzinin ali məktəblərə keçirdiyi qəbul imtahanlarında Bakı Ali Neft Məktəbi üzrə ümumi minimal bal 645, ümumi orta bal isə 667 olub. I qrup üzrə keçirilmiş test imtahanlarında 700 bal toplayan tələbələrdən 2-si Bakı Ali Neft Məktəbinə qəbul olub. 2016/2017-ci tədris ilində BANM-in 17 tələbəsi Prezident təqaüdünə layiq görülüb.

2017-ci il may ayının 1-də  Qafqaz regionunun ən böyük kampusu olan BANM-in yeni kampusunun Azərbaycan Respublikasının Prezidenti İlham Əliyev tərəfindən açılışı olub. Ölkə başçısı açılış zamanı Ali Məktəbin fəaliyyətini yüksək qiymətləndirərək deyib: “Bu gün ölkəmizin həyatında çox əlamətdar bir gündür. Bakı Ali Neft Məktəbinin şəhərciyinin açılışını qeyd edirik. Bu şəhərcik ən yüksək standartlara cavab verir. Bakı Ali Neft Məktəbi artıq 6 ildir ki, fəaliyyət göstərir. Bu fəaliyyət çox uğurludur. Bu illər ərzində Ali Məktəb Azərbaycanın təhsil məkanında artıq öz layiqli yerini tuta bilibdir. Bu gün Ali Məktəb yeni şəhərciyə, yeni binaya köçür. Burada oxumaq, biliklərə yiyələnmək üçün bütün şərait yaradılıb, ən müasir texnologiyalar tətbiq olunur. Bütün binalar çox gözəl, zövqlə tikilib, burada ən müasir laboratoriyalar fəaliyyət göstərir və bu  gün mənə təqdimat da edildi. Burada təhsilin səviyyəsi ən yüksək standartlara cavab verəcək ...”

Yeni kampusda ən müasir texnologiyalar və zəngin maddi-texniki bazaya malik olan laboratoriyalar istifadəyə verilib. “Schneider Electric”, “ABB”, “Avandsis Group”, “Emerson process management” kimi şirkətlər müasir laboratoriyaları BANM-ın yeni kampusuna hədiyyə ediblər.

2017/2018-ci tədris ilində Dövlət İmtahan Mərkəzinin (DİM) ali məktəblərə keçirdiyi qəbul imtahanında Bakı Ali Neft Məktəbi üzrə ümumi minimal bal 662, ümumi orta bal isə 679 olub. I qrup üzrə keçirilmiş test imtahanlarında 700 bal toplayan 7 tələbənin 7-si də Bakı Ali Neft Məktəbinə qəbul olub. 2017/2018-ci tədris ilində BANM-in 24 tələbəsi Prezident təqaüdünə layiq görülüb.

2017/2018-ci tədris ilində BANM-də ilk dəfə magistratura pilləsində “Neft-qaz mühəndisliyi” və “Kimya mühəndisliyi” ixtisaslarının tədrisinə başlanılıb.

2017-ci ildə BANM, BP və onun tərəfdaşlarının birgə əməkdaşlığı, həmçinin Böyük Britaniyanın “TwentyEighty Strategy Execution” (STRATEX) şirkəti ilə birgə həyata keçirilən və ABŞ-ın  Corc Vaşinqton Universitetinin Magistr sertifikatı ilə təmin edən təlim proqramı - Layihə İdarəetmə Məktəbinin ilk qrupları Ali Məktəbdə tədrisə başlayıb. Layihə İdarəetmə Məktəbi BANM və Stratex şirkətinin birgə əməkdaşlığı ilə uğurla davam edir.

2018/2019-cu tədris ilindən isə Ali Məktəbdə magistratura pilləsi üzrə daha iki ixtisas – “Proseslərin avtomatlaşdırılması mühəndisliyi” və “Biznesin idarə edilməsi” (MBA) ixtisasları üzrə ilk qəbul keçirilib.

2018/2019-cu tədris ili üçün BANM-də bakalavr pilləsi üzrə yeni ixtisas – “İnformasiya təhlükəsizliyi” ixtisasına ilk dəfə DİM tərəfindən qəbul keçirilib.

2019/2020-ci tədris ilində Azərbaycan Respublikasının ali məktəblərinə daxil olmuş tələbələrə Prezident təqaüdünün verilməsi” haqqında Sərəncamına əsasən, Bakı Ali Neft Məktəbinin 23 tələbəsi Prezident təqaüdünə layiq görülüb. Ali Məktəbin yarandığı ildən bu günə qədər Prezident təqaüdçülərinin sayı 150 nəfərə çatıb. Bu tədris ilində Ali Məktəb üzrə 11 nəfər 680-dən çox bal toplayıb. İndiyədək isə BANM-in 26 tələbəsi 700 bal toplayaraq ölkə üzrə rekorda imza atıb.

2019/2020-ci tədris ilində Bakı Ali Neft Məktəbinin 2 ixtisası - İnformasiya təhlükəsizliyi - 673,5 bal, Proseslərin avtomatlaşdırılması mühəndisliyi 657,8 bal olmaqla, növbəti dəfə ölkə universitetləri arasında ən yüksək keçid balı olan ixtisasları olub.                  

BANM ötən müddət ərzində həm də ən müasir tələblərə cavab verən infrastruktur yarada, idarəetmə və pedaqoji heyəti də formalaşdıra bilib, professor-müəllim heyətinin tədrisdə, tələbələrin isə təhsildə motivasiyalarını yüksəltmək üçün silsilə həvəsləndirici və səfərbəredici tədbirlər həyata keçirilib.

BANM-in xarici şirkətlərlə əməkdaşlıq, yerli və xarici şirkətlərin peşəkar mütəxəssisləri tərəfindən tələbələr üçün təlimlər, mühazirələrin təşkil olunması, BANM tələbələrinin təhsillə yanaşı, həm də müxtəlif ictimai layihələrdə yüksək nəticələr göstərməsi, qısa müddət ərzində ictimaiyyət arasında qazanılan etibar və bu kimi digər nailiyyətləri Azərbaycanın ən yüksək intellektli gəncliyini burada təhsil almağa cəlb edir.

BANM Azərbaycanda ali təhsil müəssisələri içərisində yeganə Ali Məktəbdir ki, ISO 9001 (Keyfiyyət idarəetmə sistemi), ISO 14001 (Ekologiya idarəetmə sistemləri), OHSAS 18001 (Əməyin mühafizəsi və təhlükəsizlik texnikası idarəetmə sistemləri) və ISO 10002 (müştəri məmnuniyyəti – şikayətlərin idarə edilməsi üzrə rəhbər göstərişlər) sertifikatlarına malikdir.

Çox qısa zaman müddətində BANM ən yüksək nüfuzlu ali təhsil müəssisəsinə çevrilə bilib. Bu gün BANM ölkəmizdə ən öndə gedən ali təhsil müəssisəsidir. BANM Azərbaycanda peşəkar mühəndis kadrların hazırlanmasında liderdir. BANM tələbələri transmilli, beynəlxalq neft-qaz şirkətlərində, o cümlədən SOCAR-ın bütün müəssisələrində istehsalat təcrübəsi keçirlər ki, bu da onların gələcəkdə beynəlxalq standartlara uyğun kadrlar kimi yetişməsinə imkan yaradır.